ایرانی ذرائع ابلاغ کے مطابق اسرائیل نے شمال مغربی ایران میں متعدد مقامات پر فضائی حملے کیے ہیں۔ نیم سرکاری خبر رساں ایجنسی ”ایسنا“ کے مطابق حملے مشرقی آذربائیجان صوبے کے دارالحکومت تبریز کے جنوب مغربی حصے میں دو مقامات پر کیے گئے۔
ایجنسی نے صوبے کے بحران انتظامیہ کے سربراہ مجید فرشی کے حوالے سے بتایا کہ حملے کی نوعیت اور نشانہ بننے والی جگہوں کی تفصیل فوری طور پر واضح نہیں ہو سکی، تاہم ایرانی فضائی دفاعی نظام متحرک ہو گیا اور حملے کا جواب دینے کے لیے اقدامات کیے گئے۔
اسرائیل کا ایران کے خلاف حملوں میں اہم کامیابیاں حاصل کرنے کا دعویٰ
قبل ازیں، اسرائیل نے ایران کے خلاف حملوں میں اہم کامیابیاں حاصل کرنے کا دعویٰ کیا ہے۔
رپورٹ کے مطابق ایک اسرائیلی فوجی ترجمان کے مطابق 30 اسرائیلی لڑاکا طیاروں نے ایران پر درجنوں حملے کیے، جن میں اصفہان، بوشہر، اہواز اور یزد میں فوجی تنصیبات کو نشانہ بنایا گیا۔
ترجمان نے دعویٰ کیا کہ یزد میں بیلسٹک میزائلوں کے بڑے ذخیرے کو نشانہ بنایا گیا۔
اسرائیلی ترجمان نے دعویٰ کیا کہ اصفہان، بوشہر اور اہواز میں میزائل لانچنگ پلیٹ فارم تباہ کردئیے۔ ڈرون گودام اور فضائی دفاعی بیٹریوں کی تیاری کے مقام کو بھی نشانہ بنایا گیا۔
ٹرمپ کا ایرانی ایٹمی تنصیبات مکمل تباہ کرنے کا دعویٰ، امریکی اخبار نے اہم انکشاف کردیا
ترجمان کا مزید کہنا تھا کہ زنجان پر حملے میں لانچنگ پلیٹ فارم پر کام کرنے والے 3 ایرانی فوجی اہلکار جاں بحق ہوگئے۔
ایران پر حملے سے قبل امریکا اور اسرائیلی حکام کے درمیان ٹیلی فون کال پر گرما گرمی
اسرائیلی فوج نے اپنے ایک بیان میں کہا ہے کہ اس کے ایران میں دیگر اہداف بھی ہیں اور وہ فوجی کارروائی جاری رکھنے کا ارادہ رکھتی ہے
