کراچی (13 نومبر 2025): بلاول ہاؤس کے قریب سیف سٹی پروجیکٹ کے کیمروں کیلیے لگایا گیا ڈسٹری بیوشن باکس چوری کر لیا گیا۔
ڈائریکٹر جنرل سیف سٹی پروجیکٹ آصف اعجاز شیخ نے اس کی تصدیق کرتے ہوئے بتایا کہ کیمروں کا ڈسٹری بیوشن باکس چوری ہونے کے بعد سیف سٹی کے کیمرے اتار لیے گئے۔
یہ بھی پڑھیں: سیف سٹی کیمرے کی مدد سے جعلی اور چوری کی گاڑیاں پکڑی گئیں
آصف اعجاز شیخ کے مطابق بلاول ہاؤس چورنگی کے قریب سیف سٹی کیمروں سے منسلک ڈی بی باکس چوری ہوا ہے جس کے بعد کیمرے بند ہوگئے جنہیں کھمبے سے اتار لیا گیا۔
انہوں نے کہا کہ ڈسٹری بیوشن باکس میں لاکھوں روپے مالیت کا سامان ہوتا ہے، چوری ہونے پر الارم کیوں نہیں بجا اس کی بھی معلومات لے رہے ہیں۔
پولیس حکام کے مطابق بلاول ہاؤس کے قریب سیف سٹی پول سے ڈسٹری بیوشن باکس کی چوری 6 نومبر کو ہوئی، سیف سٹی پروجیکٹ انتظامیہ نے بوٹ بیسن تھانے میں اطلاع دی تاہم مقدمہ درج نہیں کروایا۔
واضح رہے کہ چوری کی مذکورہ واردات ایک ایسے وقت میں سامنے آئی ہے جب کراچی میں فیس لیس ٹکٹنگ سسٹم کے تحت ٹریفک قوانین کی خلاف ورزی کرنے والوں کو ای چالان جاری کیے جا رہے ہیں۔
بلاؤل ہاؤس کے قریب مصروف ترین چورنگی پر کیمروں کا ڈسٹری بیوشن باکس چوری ہونے کی واردات حیران کر دینے والی ہے۔
