فیصل آباد: کیمیکل فیکٹری میں دھماکا کیسے ہوا؟ ابتدائی رپورٹ سامنے آگئی
فیصل آباد: ملک پور کی کیمیکل فیکٹری میں بوائلر دھماکے کی ابتدائی تحقیقاتی رپورٹ سامنے آگئی۔
کمشنر فیصل آباد راجا جہانگیر انور کا کہنا ہے کہ حادثے میں جاں بحق افراد کی تعداد 16 ہو گئی ہے جبکہ 7 افراد زخمی ہیں جنہیں طبی امداد دی جا رہی ہے۔
راجا جہانگیر انور کا بتانا ہے ابتدائی اطلاعات کے مطابق فیکٹری میں دھماکا گیس پائپ لائن پھٹنے سے ہوا، زیادہ جانی نقصان فیکٹری سے ملحقہ گھروں کے رہائشیوں کا ہوا۔
انہوں نے بتایا کہ ملک پور میں 4 فیکڑیاں ایک ساتھ منسلک ہوکر کام کر رہی تھیں، وزیراعلیٰ پنجاب خود ریسکیو آپریشن کو مانیٹر کر رہی ہیں۔
خیال رہے کہ ملک پور کی کیمیکل فیکٹری میں ہونے والے دھماکے کی آواز دور دور تک سنی گئی اور دھماکا اس قدر شدید تھا کہ فیکٹری کی عمارت زمین بوس ہو گئی جبکہ قریبی گھروں کی چھتیں بھی گرگئیں۔
