محکمہ موسمیات نے کراچی کے مختلف علاقوں میں آج صبح ہونے والی بارش کے بعد اعداد و شمارجاری کردیے ہیں۔
محکمہ موسمیات کے مطابق کراچی میں اب تک سب سے زیادہ بارش سعدی ٹاؤن میں 36 ملی میٹر ریکارڈ کی گئی ہے۔ اس کے علاوہ گلشنِ معمار میں 33، ناظم آباد میں 26، سرجانی ٹاؤن میں 12، مسرور بیس پر 11 اور کورنگی میں 5 ملی میٹر بارش ہوئی۔
اسی طرح یونیورسٹی روڈپر 4، گلشنِ حدید اور ڈی ایچ اے میں 3،3، اورنگی ٹاؤن میں 2، فیصل بیس اور نارتھ کراچی میں ایک، ایک ملی میٹر بارش ریکارڈ کی گئی ہے۔
موسم کا حال بتانے والوں کا کہنا ہے کہ آئندہ 24 گھنٹوں کے دوران موسم مرطوب اور مطلع ابرآلود رہنے کا امکان اور ہوا میں نمی کا تناسب 60 سے 85 فیصد رہنے کا امکان ہے۔
کراچی کے مختلف علاقوں میں وقفے وقفے سے بارش کا سلسل جاری ہے جہاں مختلف شاہراہوں اور سڑکوں پر پانی جمع ہوگیا جس کے باعث ٹریفک کی روانی متاثر ہے۔
سوک سینٹر سے اسٹیڈیم جانے والی سڑک پر شدید ٹریفک جام ہے جبکہ سوک سینٹر سے سینٹرل جیل جانے والے روڈ پر بھی ٹریفک کا دباؤ ہے۔
ناظم آباد سے لسبیلہ جانے والے روڈ پر پانی جمع سے ہونے سے ٹریفک کی روانی متاثر ہے، گلشن اقبال، بنارس اور نگی ٹاؤن میں بھی پانی جمع ہے۔
موسلادھار بارش کی پیشگوئی
گزشتہ روز محکمہ موسمیات نے شہر قائد میں دوپہر تک گرج چمک کے ساتھ بارش کی پیشگوئی کرتے ہوئے بتایا تھا کہ بارشوں کا سلسلہ 22 اگست تک جاری رہ سکتا ہے۔
محکمہ موسمیات کا کہنا تھا کہ بھارتی راجستھان پر موجود سائیکلونک سرکولیشن کے اثرات 18 اگست کی شام یا رات تک کراچی میں داخل ہوں گے جس کے نتیجے میں شہر میں بارشوں کا آغاز ہوگا۔
موسم کا حال بتانے والوں نے کہا تھا کہ آج شہر میں ہلکی سے درمیانی شدت کی بارش متوقع ہے جبکہ 20 اور 21 اگست کو گرج چمک کے ساتھ تیز اور موسلادھار بارشوں کا امکان ہے۔
