پاکستان پیپلزپارٹی کے چیئرمین بلاول بھٹوزرداری کا کہنا ہے کہ مذہب کو تقسیم کرنے کے بجائے متحد کرنے کے لیے استعمال کیا جائے، پاکستان، امریکا کے عوامی رابطے مضبوط کیے جانے چاہئیں۔
واشنگٹن میں قومی دعائیہ ناشتے کے بعد میڈیا سے گفتگو کرتے ہوئے سابق وزیر خارجہ بلاول بھٹو زرداری نے کہا کہ قومی دعائیہ ناشتے کی تقریب میں امریکی حکام سمیت دنیا بھر کے رہنماؤں سے اہم ملاقاتیں کیں، امریکا میں ہونے والے قومی دعائیہ ناشتے کی تقریب میں دنیا بھر سے اہم ترین شخصیات موجود تھیں، تقریب میں امریکی صدر نے خطاب کیا، اختتامی تقریب سے میں نے بھی خطاب کیا، بہت ہی اچھی بین المذاہب تقریب تھی۔
چیئرمین پیپلز پارٹی بلاول بھٹو نے کہا کہ پاکستان اور امریکا کے عوامی رابطے مضبوط کیے جانے چاہئیں، مذہب کو تقسیم کرنے کے بجائے متحد کرنے کے لیے استعمال کیا جانا چاہیئے۔
بلاول بھٹو نے کہا کہ میں وزیرخارجہ نہیں، تمام ملاقاتیں ذاتی حیثیت میں ہیں، یہ تقریب مذہبی رواداری کے لیے اچھا موقع ہے، معاشرے کو تقسیم سے بچانے کے لیے اس طرح کے پروگرام اہم ہیں۔
انہوں نے مزید کہا کہ لوگوں کے ساتھ برابر کی سطح پر برتاؤ کرنا چاہیئے، ہر مسلمان حضرت عیسیٰ علیہ السلام کا ماننے والا ہے ،یہ قومی دعائیہ تقریب نہیں عالمی دعائیہ تقریب ہے۔
